Ғалла бозорида давлат интервенция механизми ишлаб чиқилади
Фото: Pixabay
Ғалла бозорида давлат интервенция механизми ишлаб чиқилади. Бу ҳақда Ўзбекистон Республикаси қишлоқ хўжалигини ривожлантиришнинг 2020-2030 йилларга мўлжалланган стратегияси амалга ошириш бўйича “Йўл харитаси”да айтилган.
Унда қуйидагилар назарда тутилади:
давлат томонидан белгиланадиган ва бозор нархларида молиялаштириладиган квота асосида буғдой сотиб олиш механизмини жорий этиш;
қишлоқ хўжалиги ва озиқ-овқат маҳсулотлари нархларини давлат томонидан тартибга солишдан босқичма-босқич воз кечиш;
аудиторлик текширувидан ўтказиш асосида интервенцияларни ўтказиш қоидаларини бозор шароитларига мослаштириш учун стратегик озиқ-овқат захираларини таркибий қайта шакллантириш.
Шунингдек, озиқ-овқат ва истеъмол хавфсизлиги тизимини такомиллаштиришда ижро этувчи ҳокимият органлари фаолиятини мувофиқлаштирувчи Идоралараро озиқ-овқат ва истеъмол хавфсизлиги бўйича кенгаш ташкил этилади.
Бунда, Ўзбекистон Республикаси Қишлоқ хўжалиги вазирлигига кенгаш котибияти вазифасини юклаган ҳолда озиқ-овқат хавфсизлиги соҳасида давлат бошқаруви тизимини институционал баҳолашни таъминлаш кўзда тутилади.
Бундан ташқари, аҳолининг ижтимоий ҳимояга муҳтож қатламини озиқ-овқат билан таъминлаш механизмлари ишлаб чиқилади, шунингдек, қишлоқ хўжалиги ишлаб чиқарувчиларини ижтимоий объектлар билан интеграция қилиш чоралари амалга оширилади.
Аҳолининг озиқ-овқат хавфсизлигини баҳолаш ҳамда қишлоқ жойларни ривожлантириш бўйича давлат дастурлари ва тадбирларини ишлаб чиқиш мақсадида истеъмол ва даромадларни ўрганиш бўйича ижтимоий сўров ўтказиш ҳам мўлжалланган.
Озиқ-овқат хавфсизлигини баҳолаш тизимини жорий қилиш ва халқаро даражада тан олинган методологиялар ҳамда илғор тажрибаларга асосланган озиқ-овқат хавфсизлигининг доимий мониторингини юритиш режалаштирилмоқда.
https://kun.uz/news/2019/09/16/galla-bozorida-davlat-intervensiya-mexanizmi-ishlab-chiqiladi
