Янги дастур фермерларнинг оғирини енгил қилади
Юқори суръатларда ўзгариб бораётган дунёда ҳар соҳада инновацион янгиликлар, дастурлар яратилмоқда. Мамлакатимизда ҳам рақамли иқтисодиётни фаол ривожлантириш, барча тармоқлар ва соҳаларда, энг аввало, давлат бошқаруви, таълим, соғлиқни сақлаш ва қишлоқ хўжалигида замонавий ахборот-коммуникация технологияларини кенг жорий этиш бўйича комплекс чора-тадбирлар амалга оширилмоқда.
Ўзбекистон Республикаси Президентининг 2018 йил 2 июлдаги “Фермер хўжаликларида ҳисоб тизимини тубдан яхшилаш ва уларга банк хизматлари кўрсатишни такомиллаштиришнинг қўшимча чора-тадбирлари тўғрисида”ги қарорининг 10-бандида “Агробанк” АТБ, Ўзбекистон Республикаси Ахборот технологиялари ва коммуникацияларини ривожлантириш вазирлиги билан биргаликда фермер хўжаликларида соддалаштирилган тартибда бухгалтерия ҳисобини юритишга мўлжалланган дастурий таъминот ишлаб чиқиш, уни Марказларда қўллаш, келгусида такомиллаштириб бориш, Марказларга ва Кенгашга аъзо бўлган фермер хўжаликларига бепул тарқатиш юклатилган.
Давлат эҳтиёжлари учун пахта хом ашёси ва бошоқли дон етиштирувчи фермер хўжаликларининг агротехкарталари асосида ажратилган кредит ресурсларини онлайн тарзда бошқариш, тўловларни амалга ошириш ва қолдиқларни назорат қилиб бориш имкониятини берувчи махсус мобил банкинг дастурий таъминотини ишлаб чиқиш ва унга оид янгиликларни доимий равишда кенгашнинг ҳамда «Агробанк» АТБнинг веб-сайтида эълон қилиб бориш бўйича топшириқлар берилган.
Қарорнинг ижросини таъминлаш юзасидан Ўзбекистон Республикаси Қишлоқ хўжалиги вазирлиги қошида “agroonline.uz” ахборот тизими (дастур) ишлаб чиқилди ва бугунги кунда бухгалтерия марказларида ишлатилмоқда.
Ўтказилган видеоселектор йиғилишида “RealSoft” МЧЖ ташкилоти томонидан ишлаб чиқилган ушбу дастурдан тўғри фойдаланиш, маблағларни ўз вақтида молиялаштириш ва ташкилотлар билан ҳисоб-китоб қилиш мақсадида зарур топшириқлар берилди.
Ж.Галаев,
Ўзбекистон фермер, деҳқон хўжаликлари ва томорқа ер эгалари кенгаши бош мутахассиси
