Фермер хўжалигида ибратли тажриба йўлга қўйилган
Қувасой шаҳридаги “Раҳмат Ҳайрат Мурувват боғи” фермер хўжалигида ибратли тажриба йўлга қўйилган. Хўжалик раҳбари Лазизжон Аҳмедовнинг омилкорлиги туфайли иқтисодий самарадорлик йилдан-йилга ортаётир.
Фермер Фарғона политехника институтининг кимё-технология факультутини битиргач, Қувасой цемент комбинатида технолог бўлиб ишлади. Бироқ, ерга меҳри баландлиги боис 4 гектар олмазорни ижарага олди. 20 сотих ерда “Мерседес” ва “Шохонак” навли харидоргир узумлардан кўпайтирди. Гилос, олхўри, олманинг бошқача турларидан экди. Сўнг асаларичиликни ривожлантирди. Дастлаб 20-30 уя боқди, кейинроқ кўпайтириш чораларини излади. Мана, ҳозир 84 уя, (200 асалари оиласи) парваришлаяпти.
Айни пайтда хўжаликда 11 гектар боғ, 4 сотихли иссиқхонада мандарин, 6 сотихда лимон, 10 сотихда киви парвариш қилиняпти, 1 гектарда буғдой ўстириляпти. Лимон, мандарин ва киви янаги йилдан тўлиқ ҳосилга киради. 108 туп лимон, 118 туп мандарин иссиқхона шароитида ўстирилди. Лазизжон иссиқхонада гул кўпайтиришга жуда ишқибоз. Шаҳардаги кўплаб ташкилот, корхона, муассасага гулларини бепул тарқатади.
-Асаларининг мева гулларини чанглатишдаги ўрни беқиёс, – дейди Л. Аҳмедов – Авваллари олмадан 50-60 тонна ҳосил олардим, асалари олиб келганимдан кейин бу рақам 140-150 тоннага чиқди. Асаларининг пахта гулини ҳам чанглатиб бергани ва бу гулдан шифобахш асал яратгани бир мўъжизага ўхшайди.
Муқимжон Қодиров (сурат), ЎзА
