Наманган вилояти қишлоқ хўжалиги бошқармасида янги раҳбар иш бошлади
ТАЙИНЛОВ
Ўзбекистон Республикаси Қишлоқ хўжалиги вазирининг тегишли буйруғи билан Азизбек Бахтиёр ўғли Абдусаломов Наманган вилояти қишлоқ хўжалиги бошқармаси бошлиғи этиб тайинланди. У мазкур лавозимда ишлаган Улуғбек Жўраевнинг ўрнида иш бошлади.
Азизбек Абдусаломов 1992 йил 17 апрель куни Мингбулоқ туманида туғилган. Маълумоти олий, 2017 йилда Наманган муҳандислик-технология институтини тамомлаган. Мутахассислиги муҳандис-технолог. Тадбиркорлар ва ишбилармонлар ҳаракати Ўзбекистон Либерал демократик партияси аъзоси.
Меҳнат фаолиятини 2017 йилда Мингбулоқ туманидаги “Азизбек Абдусаломов” фермер хўжалиги раҳбари сифатида бошлаган. Кейинчалик эса у Мингбулоқ тумани Фермер, деҳқон хўжаликлари ва томорқа ер эгалари кенгаши раиси; вилоят Фермер, деҳқон хўжаликлари ва томорқа ер эгалари кенгаши раиси ўринбосари сифатида иш олиб борган.
Азизбек Абдусаломов янги тайинловга қадар, яъни 2019 йил 7 майдан буён Наманган вилояти фермер, деҳқон хўжаликлари ва томорқа ер эгалари кенгаши раиси лавозимида фаолият юритиб келаётган эди.
Айни вақтда Халқ депутатлари Мингбулоқ тумани Кенгаши депутати ҳисобланади.
ЎзА
