Ғалла – 2021: фермер дон сотиш шартномасини бажарди
Жиззах вилояти Дўстлик туманидаги “Истиқлол кафолати” фермер хўжалиги ҳудуддаги дон маҳсулотлари корхонаси билан ғалла сотиш бўйича тузган шартномасини Жиззах вилоятида биринчи бўлиб бажарди. Фермер корхонага 32,6 тонна юқори конденцияли дон сотди.
– Президентимиз томонидан ғалла етиштиришда бозор иқтисодиёти тамойилларига ўтишни кенг жорий этиш, дон сотиш бўйича давлат буюртмаси қилиш бўйича амалга оширилаётгани туфайли деҳқон ўз эҳтиёжларидан келиб чиқиб маҳсулот етиштириш имкониятига эга бўлмоқда, – дейди фермер хўжалиги раҳбари Отабек Тўраев. – Жами 60 гектар ерда деҳқончилик қиламиз. Иқтисодий имкониятларни, алмашлаб экиш талабларини ҳисобга олиб дон корхонаси билан 32,5 тонна дон бўйича шартнома тузгандик. 10 гектар майдоннинг 7 гектаридан олинган ҳосил билан шартномани бажардик. Қолган майдондан олинган дон хўжалигимизнинг ички эҳтиёжлари учун ишлатилади.
Дўстлик тумани вилоятда энг кўп ғалла етиштирувчи туман ҳисобланади. Жорий йилда туман фермерлари 13 минг 700 гектар майдонда мўл ҳосил етиштирди. Ушбу майдонлардан 45 минг 990 тонна дон ҳосили йиғиштириб олиш мўлжалланган.
Айни кунларда туманнинг барча ҳудудларида ғалла ўрими қизғин бораётир. Мавсумда қатнашаётган 48 та комбайн билан ҳар куни 250 гектардан зиёд майдоннинг ҳосили йиғиб олинмоқда. Ҳозиргача жами ҳосилнинг 2 минг тоннага яқини йиғиштириб бўлинди.
Туманда етиштирилган ҳосилни нес-нобуд қилмасдан уюшқоқлик билан йиғиштириб олиш учун мавжуд комбайн, ғалла ташувчи транспорт, техник хизмат кўрсатувчи, таъминотчилардан иборат 22 та ўрим-йиғим отряди ташкил этилган. Синовдан ўтган бу усул ғалла ҳосилини қисқа фурсатларда, ортиқча йўқотишларсиз, нобуд қилмасдан йиғиштириб олиш имкониятини яратади.
Мавсумда механизаторлар ҳамда ташувчи техникалар ҳайдовчилари манфаатдорлигига алоҳида эътибор қаратилаётир. Транспортлар учун ёқилғи таъминоти бўйича ҳам қулай тартиб жорий этилган.
Бу йил вилоят ғаллакорлари 101 минг гектардан зиёд ер майдонида ҳосил етиштирди. Шу кунларда барча туманларда ҳосил ўрим-йиғими қизғин бораётир.
Т.Бекназаров, Ж.Ёрбеков (сурат), ЎзА
https://uza.uz/uz/posts/galla-2021-fermer-don-sotish-shartnomasini-bazhardi_274897
